Sasa Nan Tibo Kudian

Penulis :

M. Dzaki Annafi .N, Mahasiswa Jurusan Sastra Minangkabau Universitas Andalas

Carito dimulai dari salah satu kampuang yang ado di Padang Panjang. Ado saurang Lareh Tuanku yang banamo Simawang. Baliau hiduik sarupo urang nan pasti akan manyasa di kudian hari. Simawang punyo bini yang banamo Jamilah dan alah baranak pulo duo laki- laki banamo Darma jo Samsudin. Jamilah adolah urang bini nan indak mampunyol urang gaek talabiah Jamilah kabanyo indak ba suku pulo.

Di awal carito, Simawang yang nampak tacelak dari jauah bamukasuik ka pai kumisi ka ranah Batusangka nan ka rumah Angku Kapalo. Sarupo urang ka pai baparang, Simawang mamakai baju gantiang kaliang, deta balilik di kapalo, karih tasisiak di pinggang bahkan pakai pulo sisampiang kain balapak.

Mancaliak nan bak kian, bakato lah Jamilah

"Manolah tuan Simawang, handak kamano tuan kini, iyo lah sarupo urang ka pai parang nampak"

Manjawek Simawang

"Bukan denai pai parang, hanyo denai pai kumisi, ka ranah Batusangka, iyo lah ka rumah Angku Kapalo"

Mandanga nan bak kian, Jamilah alah maklum dalam hati, bantuaknyo sajo pai kumisi, tapi batinnyo handak pai babini iyolah ka rumah Rawani. Ndak lamo sudah tu, Simawang barangkek lah dari rumah handak manuju ka rumah Rawani. Sampai Simawang disitu dan alah mangecek pulo kapado Angku Kapalo dapeklah jawek sasuai kandak hati baliau.

Simawang bakato

"Sabulan lamonyo ambo nantikan, tantukanlah sakali lai tidaknyo, nak dapek ambo mangirokan"

lyolah kironyo Simawang handak babini baliak ka Batusangka. Antah apolah nan baliau pikiaan di wakatu itu. Indak takana anak bini nan ado di kampuang..

Sarupo anak mudo nan sadang angek dek jatuah cinto, Simawang marasoan itu pulo. Sadang duduak di tangah rumah nan pangana iyo ka Rawani taruih. Alah sampai di dalam lubuak dan indak tantu apo ka di sabuik lai. Alah duduak makan baduo jo Jamilah tapi nan pangana iyo ka Rawani juo. Manangih lah Jamilah indak tantu pulo apo ka disabuik lai. Awak urang bini nan indak basuku, indak pulo punyo sanak keluarga.

Alah sahari duo hari, sampailah sapuluah hari Simawang iyo bamanuang juo. Alah datang surek dari Batusangka untuak manyuruah Simawang basagiro barangkek. Dituruik lah aciak nyo dek Simawang ko untuak mangecek sarato manyampaian mukasuik handak babini baliak.

Bakato lah Aciak tadi nan banamo Rawiyah

"Anak kanduang Simawang, mancaliak kapado Jamilah, anak urang nan sadang hamil, ibu indak ado, kampuang pun baitu, muluik manih kucindan murah"

Mandanga kato bak kian, bagageh lah Simawang pulang baliak ka rumah yo handak mangecek jo Jamilah. Indak lamo antaronyo mangecek lah Simawang

"Kini baitu malah dek adiak, barilah izin denai malangkah, supayo salamaik pulang pai, nak sanang pulo paratian"

Apolah kato nan ka dijawek, Jamilah hanyo manangih sadu-saduan mangana untuang jo parasaian. Dihimbau lah anak kanduang nan baduo yo si Darma jo si Samsudin. Jo hati barek bakato lah Jamilah ka anak nyo nan baduo

"Marasai bana malah kito, lah dapek di ayah kau pangganti mandeh, iyolah si Rawani

Tibolah Simawang di rumah Rawani dan alah sudah pulo batimbang tando. Disaat yang samo Jamilah jo duo anak kanduang nyo pai manuruik aciak Rawiyah untuak bajaleh jaleh dan minta maaf. Disitu Jamilah handak mamintak pisau nan tajam untuak pancukua abuak si Samsudin. Tapi kironyo Aciak Rawiyah iyo indak ado punyo pisau

Sampai Jamilah di rumah, inyo buka lamari camin untuak maambiak pisau rencong Aceh nan ado di dalam peti gadang. Ditutuik pintu kasadonyo, disingkokkan cando kulambu, laloklah inyo katigonyo, di kida ado si Darma nan di suok ado si Samsudin, Lah lalok si Darma sugiro lah Jamilah maambiak pisau iyo inyo irih lihia si Darma. Sarupo caciang kanai pangkua, sarupo ayam kanai lakak alah mahampeh-harnpehkan badan iyolah si Darma tadi.

Alah mati si Darma, langsuanglah Jamilah lari mangaja si Samsudin nan mati katakuik an. Samsudin nan barusao lari tapi tajatuah dek raso panik nyo. Mato tapiciang pisau pun lakek sarupo caciang kanai pangkua. Alah mati pulo si Samsudin, dicarilah kain panjang diganggam pisau sabalah suok. Pisau lakek kain tarajok iyolah samo mahampeh- hampehkan badan diateh lantai

Tabariang lah mayik tigo urang di rumah tu, surang urang pun indak ado nan tau. Nan mandapek dan manyobok an adolah Rang Jago Gadang. Katiko itu Rang Jago Gadang tibo dirumah Jamilah untuak mamasuak an kudo ka dalam kandang Nampak darah baserak di lantai dan nampak pulo Jamilah jo duo anaknyo alah tabujua badarah-darah.

Sampailah kaba ka talingo Simawang nan sadang di ranah Batusangka. Bagageh lah Sumawang pulang handak mancaliak iyolah Jamilah jo anak kanduang nyo nan baduo Sampai di ranah Simawang, urang alah rami tagak di laman. Simawang langsuang balari ka dalam rumah, kadapek an lah Jamilah jo duo anak kanduangnyo alah mati basibah darah. Basugirolah urang untuak mamandian mayik jo mangafani. Kubua alah tagali untuak urang nan batigo.

Sasudah kajadian tu, Simawang alah sarupo urang kanai. Tiok wakatu bamanuang mamikiaan Jamilah jo duo anak kanduangnyo. Hati ibo taraso, pangana kasitu taruih baulang-ulang. Alah cubo pulo dibaok Simawang ko ka dukun-dukun untuak barubek. lyo lai ba ransua cegak, alah hampia timbua baliak pangana nyo.

Tasabuik kecek dek Simawang ka diri nyo

"Tidaklah hati saramuak iko, rusuah bacampua jo ibo hati, bukan denai ibo di badan surang, tapi denai ibo di anak nan mati, rusuah di anak nan hilang

Takana dek Simawang doso nan tapabuek, maminta tobat kapado Allah, pai sumbahyang inyo ka surau, itu karajo nyo siang malam, mandoa tiok patang Kamih, dimintak safaat siang malam

lyolah emang SASA NAN TIBO KUDIAN (**)